我認我係好易會上癮既人，呢篇野好長，寫既係關於露營煮食爐，包括 gas、白電油、柴同埋酒精。
近年我再次投入露營活動，因為人生階段既轉變 (難約人，難夾時間，而事實上，香港假日已經不太適合露營，人實在太多了)，我甚至開始一個人去露營，所以不再像以往，可以靠朋友提供某些用品，例如煮食爐。短短幾年，我竟然試齊了差不多各種煮食爐，在此簡單分享。
露營煮食爐，主流肯定係 gas 爐，因為佢方便易用，火力足夠亦容易調校，大中小火都可以，燃料和爐頭又容易買。Gas 爐的燃料，當然係 gas 喇，而 gas 主要可以分做高山氣 (下圖橙色) 同埋邊爐氣 (國內叫長氣罐)，外觀睇包裝唔同，但其實內涵都唔同既。
邊爈氣容易買，價錢也比較平，但一般都需要轉接頭，才可以用在露營爐頭上。轉接頭可以算係有兩種 (款式其實超多)，一種如上圖，基本上是個小三腳架 (一體式)，而另一種，就係一個厚身金屬環 (分體式)。我個人覺得三腳架呢種比較好，因為可確保邊爐氣樽的方向正確。三腳架呢種用於一體式，而另一種就係分體式用。
話說原來邊爐氣樽某一方一定要向上，這是關乎氣樽內部結構，而放置不當呢，其實係會影響氣化過程，少則燃燒不穩定，嚴重有可能會出意外... 若果方向不正確，會令液化氣體未被適當氣化時，就突然湧出，造成突發性既火力增加，情況可大可少架。
厚身金屬環那種屬於分體式，即係有條氣喉既... 當然，我都見過人玩野，將個接環直駁氣樽同埋爐頭，結果個爐頭當然係高，仲係好高... 但點平衡呢？
高山氣就可以直接用，但價錢比較貴，又比較難買，要去露營用品店先買到。高山氣都分幾種大少（其實邊爐氣都有細支既，不過好少見），下面係中等 size，有一種再細支啲既，另一種就再高身啲，揀邊款就視乎用量吧！當然亦可考慮埋行程，帶上山行得遠，當然越細支越好喇！
響香港既營地，咩氣都無分別，無需要特別追求高山氣。高山氣當然係較適合高山使用，但香港最高既山都唔使咯。另外，高山氣罐一般可以塞埋入個煲度，佔背包空間較細。但我通常會塞個水煲入個煲度，所以對我嚟講無大分別。當然，有時懶起嚟，我都會唔帶水煲，而直接放隻鈦杯上去煲水，咁又另計喎... 唧係咁，千變萬化，自己諗喇！
Gas 爐有好多種，下圖有個好似個蓮花咁既，有埋內置風擋，又有電子打火，都係幾十蚊，好似幾好咁喎！佢屬於分體式，有條氣喉接駁氣罐，而有款差唔多既，就無咗條氣喉，變成一體式直駁入爐身。呢件野既問題係，佢其實都算係重、又大件，所以我已經放棄咗佢了。
我又試過用下面既，即係簡單既一個爐頭，無風擋，連個 stand 都無，用高山氣就靠氣罐做 stand，即係一體式；若用邊爐氣呢，就要靠個 adapter 做 stand... 當中左邊大少少既，有埋電子打火，而右邊既呢，超細呢個，係全鈦金屬，無電子打火，又輕又細，重量不及右邊既三份之一！
呢度要提一點，電子打火呢吓野，其實唔太信得過，最好都係要帶多個火機。打唔著你都無仇報，當然，借火其實都幾易，但荒山野嶺都搏唔過 (假日除外，因為實有人)！
右邊呢兩個既係一體式，若果接邊爐氣罐用，就要用有三腳架那種轉插。
Gas 爐幾乎唯一唔既好處，就係每次露營都會產生空氣樽，而空樽亦難以回收，實在太唔環保了。你熱愛大自然先露營唧，當然要考慮環保問題！再者，有啲人怕重，回程時未用盡既氣樽，就會掉咗佢，令成件事更加之唔環保。最簡單既解決辦法，當然係送俾人，又或者帶返屋企下次再用。但無論如何，最後空既氣樽，你都係會揼咗佢。
坊間有工具可以 refill 高山氣罐，但這做法相當危險，個人不太建議。坊間亦有人教點樣放清啲氣，然後打個大洞，再攞去回收，但呢點同樣有相當危險性，個人亦不太建議了。
正因為咁，我就開始玩白電油爐。電油爐既燃料樽可以重用，所以無咗呢個棄置空樽既問題。用晒啲電油，就倒返啲入去，就係咁簡單。當然，一體式電油爐要小心，加電油時要確保個爐熄咗火，仲要冷卻了，才可以加，唔係搶火就大鑊！分分鐘唔係燒著，而係爆炸咯。
白電油可以在五金鋪買（有賣油漆既，或者大間啲既就應該有）。五金鋪買白電油，一般分樽裝和罐裝，個人強烈建議買罐裝既。因為樽裝其實係分銷拆細既方法，老闆用舊既啤酒樽分拆，但清潔情況成疑，電油有雜質呢，就可能會塞爐頭，係就大鑊了。話說塞電油爐並不是甚麼奇事，而大部份電油爐都有附送清潔工具，或甚至有士啤油咀添... 你知咩事喇咁...
而成罐呢買呢，不單係平啲，而且比較乾淨，塞爐機會大減，當然香港有土地問題，買一大罐呢，分分鐘幾年先用得晒，佔地方之餘，亦有一定危險性，話晒都極易燃物品丫嘛。
論火力，電油爐係最猛火既，佢絕對拍得住屋企既煤氣爐！電油爐用起嚟亦唔太多便，首先要加壓，有啲仲要預熱 (所謂唔使預熱，其實意思都係唔使分開一個工序架咋)，要氣化過程穩定咗，先至可以開始煮食，否則會燒黑煲。
電油爐開爐時 (預熱階段)，火勢比較難控制，有時出燃料太多，會燒到好高，如果在天幕下就要加倍小心，因為有時有機會燒到都未定架。當氣化過程穩定後，電油爐會產生相當大聲浪，有人誇張到話傾唔到計，其實又未至於既，但就真係幾大聲。大排爐既爐，又或者街邊推車仔既爐果種聲浪...
論燃料費用，電油爐幾乎最平，但當然柴爐係更平喇。
電油爐火力最大，最適合一班人打邊爐；但另一方面，如果一個人用，電油爐火力可能會太大，較到最細都仲太大，會沾底，如果用嚟煮飯，難度會相應增加。如果用鈦煲就更唔適合，分分鐘連個煲都燒到變形。電油爐比較難熄得細 (唔覺意熄埋火)，細極都仲相當大咯。我估計呢點係因為佢要保持足夠熱力，去氣化啲電油吧...
電油爐都分一體式，同埋分體式，有啲分體式電油爐，可以用 gas 都得架，實行一爐兩用，有咩燒咩。分體式加油時，因為結構問題，火就一定熄咗架喇；但一體式呢，就要小心，千萬唔好著住火加電油，因為電油揮發性極強，咁搞法會搶火！
電油爐有唔少缺點，主要係會塞爐頭，又難用，聲大大，火力亦偏大，唔容易較細火，所以比較少人用。
說話某次我就係因為塞爐，結果只能夠燒柴，而呢次亦燃起我玩柴爐既興趣。
燒柴感覺更原始，而亦沒有棄置空樽既問題。燃料就地取材，亦省卻了帶燃料既重量。燒柴最大問題係會燒黑煲，而且煙比較大；而執柴同埋 keep 加柴，亦係額外既工夫！當遇上雨天或潮濕日子，更加無法可燒。
燒柴當然可以就咁燒，但煙會好大，而且煲會超黑，極難清潔！我果次突發燒柴就係咁，洗我一鑊金，但無辦法喇，好過餓死，或者取消行程丫嘛...
但...其實有特定既柴爐，可以讓柴燒得更加完整，減少黑煙，燒黑煲情況亦會無咁嚴重，清潔工夫亦因而大大滅少。其中一種係柴氣爐 (wood gas stove)，簡單嚟講，呢種爐除咗燒柴，仲會利用空氣對流原理，燒埋大部份既煙，同時又增加熱度，減少黑煙。黑煙或者燒黑煲，其實係燃燒唔完整所致嘛 (incomplete combustion)...
上圖最右邊那張，就見到柴氣被燃燒既情況，啲火呢，係由旁邊既洞燒出嚟，狀似燒 gas 咁架 (因為真係燒 gas 嘛！)。柴氣爐既最大特色，其實係火從上而下燒，啲火一方面加熱個煲，另一方面，又藉熱力逼啲柴既水份同埋汁液出嚟，熱空氣上升，帶動鮮風從爐底上升，扯埋啲柴既煙向上，再被燃燒一次，連啲氣化既汁都燒埋，藉以滅少黑煙，減少 incomplete combustion，咁就無咁黑煲，同時亦增強熱度，一舉兩得！
柴氣爐既火力其實都可以唔錯，只要有優質和比較乾身既柴。燒柴其實感覺非常良好，一方面多啲野搞，在野外幹下慢活，享受過程，又可以發洩吓細個時想玩火既慾望！如果時間充裕，天氣又許可，其實我最鍾意用柴爐咯。
講開柴，其實一地都係，樹底下已經大把，千萬唔好劈樹...再者，新鮮木都唔好燒喇，其實仲犯法添。樹枝唔使大枝，因為大都放唔入，細細枝，排靚佢，勁好燒。開始時，可以加啲乾葉入去，好快就搞掂。
柴爐最大問題係燒黑煲，同埋受天氣影響。柴爐俾人感覺係唔環保，因為燒既時候有煙！但其實呢，植物生長時，會從環境吸收炭，而燃燒時，只係將啲炭釋放返出嚟，其實算係零和喎！再者，生物燃料係屬於可再生，總好過化石燃料！燒柴亦有相當驅蚊既作用。
如果要燒柴呢，建議帶把芭焦扇 (廢青扇)，可以幫助燃燒得更好更旺，起火時亦極度有用。坊間有柴火發電爐，佢地內置風扇，不過就幾貴咯，我未玩過...
最後講埋酒精爐，其實我估計，大部份資深露營友都係用酒精爐既，或者 gas 爐。
酒精爐當然係燒酒精，而燒既係工業火酒。燒消毒火酒唔係唔得，但因為酒精成份較低，而且價錢又較貴，燒黑煲之餘，又火力細，何必呢？
工業用酒精，可以去五金鋪買，叫「士力水」，同白電油差不多價錢，好似仲平過白電油啲啲，以容量計其實係平過白電油，但因為每單位含既能量較低，所以其實係貴過白電油。
酒精爐既原理好簡單，所以好多人用汽水罐嚟 DIY，但為咗耐用啲，建議都係買返嚟喇。用法非常簡單，首先倒啲酒精入去，然後點火，完。
但過程是咁的：當酒清燒著了之後，酒精因著熱力而會慢慢被氣化，然後氣化了既酒精呢，就從酒精爐既氣孔上升，然後再被燒著，因為氣化咗，所以會燒得更快更好，火力亦加大了。
酒精爐既火力係最細，但又算係完全靜音 (除咗燒完熄果下會有聲)；缺點係燒完之後，要攤凍返先可以再加燃料，然後又要再點火。若果未熄火，又或者未夠凍就加燃料，分分鐘會搶火，咁就慘慘豬！搶火係會爆炸，唔單止係燒得猛，唔係講笑既！呢個亦係酒精爐既最大風險，初學者務必小心。尤其係日間好難睇到有無火架，因為個火主要係深藍色。頹就搵手感覺有無火，認真就搵條幼樹枝，或者枯葉放埋去，睇吓會唔會燒著。
酒精爐火力弱，每次添燃料只可用大約三十多分鐘，加燃料亦不容易 (上面解釋過)，所以屬於係自私爐... 因為火力弱，所以也不宜打邊爐，一個人慢食除外。
話雖如此，高手們能把壞處化為好處。舉例，酒精爐燃料雖然要常添加，但卻可以精準控制，所以有人鐘意用佢嚟煮飯，因為只需要固定了燃料份量，等佢燒乾了一轉，然後自然會熄火，之後唔使理佢，尤得佢再焗一陣，就剛好煮得完美。
酒精爐簡單，所以亦最輕便；佢火力細，亦適合配合鈦煲，不會易沾底，又不會燒壞個鈦煲。個人認為酒精爐同鈦煲實在係天生一對。
酒精爐好輕，又唔需要獨立燃料樽去運作，所以佢雖然慢，但你可以帶多幾個去架嘛，一樽燃料，倒入幾個爐，一齊煮，掂晒！你無得一樽 gas 幾個爐一齊用嘛，但酒精就可以了。
酒精爐結構簡單，分別在於材料、煲架同埋風擋。上面呢種算係煲架，勉強都有啲風擋既作用。
呢種呢，煲架就最簡單，只係兩片金屬片，唔用時可以拆出嚟，成件野放晒入個杯度！呢個係 titanium 料，所以極輕，佢重有兩圈出氣位，火力更大。
小結
咁用咩爐好呀？簡單答就 gas 喇！
行得遠例如要上山咁呢，我會用酒精爐，因為佢夠輕便，而行遠山亦唔會食得太複雜，火力亦不需要太大。
如果三五知己食大餐，gas 爐就最好喇...
如果大棚人，就電油爐喇，火力夠大，唔會餓親大家...
一個人逍遙遊，就用柴爐吧，享受全大自然生活...
If I can only keep one... that would be a gas stove.
Posts
