紥營小貼士

最近同班小學生露營，第二朝大雨，剛好試吓各人既工程喇！落

呢兩張相都夠晒代表性！第一張，見到外帳有個扣位，呢個位平時唔落營釘都無大問題，但若雨勢大的話，唔落就會出現外帳貼實內帳，結果就容易水滲水！

另外呢張，都係完美示範點出錯：

1. 風繩角度落錯，應該同條營骨一致，咁落法失咗作用
2. 外帳既骨同營骨亦不一致，又係會外帳貼內帳懸兇

結果當然又係滲水，最後俾返張正確示範：

當然，小學生要求咪咁高喇，佢地第一次去露營唧，都算係咁！

Going ultralight: Carbon fibre poles (DIY) 碳纖維天幕桿

天幕係一件好正既野，但天幕杆卻係相當重，幾乎等於帶多個營既重量！

最起初貪平，走去買套裝天幕，不過原來係跟鐵桿，鐵桿好重，又唔夠硬淨，用咗唔夠五次已經開始出問題，節與節之間既回開始爛，其實唔影響操作既，不過就令人心思思想換。

後來買咗兩枝鋁桿，三峰出品，每支 350g (鐵桿兩支加埋近 1kg)，輕唔少，兼且實淨啲。其實起心買多兩支，另一個目的係四枝桿齊開，面積會大好多！不過咁耐都未試過，除咗有次同朋友仔一齊，每人帶兩枝，先會咁樣開法。

後來用癢癢想輕，買咗兩支副桿，得 11mm 粗，試過帶上山，有一次彈性，風頗大都無斷，但臨瞓就收返埋，始終怕出事。用 11mm 呢種桿，一定係搭細天幕，就算 3x3 都應該好易爛。

為咗輕，其實亦可以用樹幫手，好多時一枝桿都夠喇。

最近見人地玩碳纖，當然想試。坊間有現成既賣，但只得 13mm 粗，又好貴，覺得唔值！何不 DIY 呢？買齊兩支既材料，都只係貴過現成一枝少少咋！更重要係可以整返粗啲！

結果，買咗四枝一米長既碳纖維桿，賣家免費切開，變成半米長：

然後用塑鋼土裝上接口，因為啲接口係 20/18，而我啲桿只係 16/14，所以塑鋼土正好填返滿空隙！唔知實淨無，要出去試吓，屋企略略試似乎唔錯：

最後拉橡筋，上埋頭頭尾尾．．．當然無咁順利喇，啲頭尾配件話適合 16mm 桿，但結果頂針係 perfect fit，但底腳係要沙紙磨完入勉強入到！

製成品一枝 219g，相比起三峰鋁桿，每枝輕咗 130g，正！

我只係整咗兩枝，就算造齊四枝，都仲輕過兩枝鐵桿。

材料連結，給大家參考：

接駁件 (18mm /20mm 铝合金管连接器)，一枝需要三套接口

https://item.taobao.com/item.htm?spm=a1z09.2.0.0.419b2e8dJVpZdG&id=563849321643&_u=pmnemopfd64

天幕桿頂針／腳　（天幕铝杆专用铝针+尖锥头　天幕杆配件），一枝需要一套

https://item.taobao.com/item.htm?spm=a1z09.2.0.0.419b2e8dJVpZdG&id=25109096029&_u=pmnemop5df5

碳纖管：

https://item.taobao.com/item.htm?spm=a1z09.2.0.0.419b2e8dJVpZdG&id=524550457690&_u=pmnemop3ce7

--

後來發現塑鋼土並不穩固，所以再加了碳纖布，但這些碳纖布很難處理，很快乾，乾了太堅固，粘到手就大麻煩！而且外貌極差：

這杆後來某次被風吹壞了，但斷的不是碳纖，也不是接口的碳纖布，而是金屬接口！

從當晚風勢和斷口來看，似乎是 chok 斷了，也有扭斷的機會，或者兩者都有。

淘寶營幕／帳幕

諗返起幾年前開始身痕想露返營... 經濟之選當然要睇吓淘寶，而有啲真係平到唔敢買，所以既然夏天無得去露營，就手痕寫幾句俾大家參考吓。

首先，要避免啲咩即開營，包括自動彈開既，或者好似縮骨遮咁嗰種。講出嚟好似好方便，但實情係伏嚟！自動彈開既，大風啲都死，有雨就直頭玩完！除非係去沙灘遮吓陽光咁都仲得，想過夜就唔好喇！另外縮骨遮嗰種主要問題係好重，又大大件，仲有亦同縮骨遮一樣，大少少風都會吹斷！防水性能好過自動彈開嗰種，但都只係可以擋毛毛雨！另外有啲塑膠骨既都要避免！

最簡單方法係揀牌子，以下幾隻都有啲保證：

1. 牧高笛 (Mobi Garden)：呢個牌子實而不華，無太多花巧

2. Nature Hike 或稱 nh：呢個牌子人地話「世界第一」(鐘意抄襲)，佢啲野其實幾好，不過要小心佢成日重量都唔計地釘、風繩！扮晒輕過人，其實最終計埋唔一定。

3. 三峰 (3F)：呢隻牌子唔錯，但比上面兩個略貴一點。佢除咗抄人之外，偶爾都有啲原創性，算係有心既生產商之一。

4. 龍行者 (Longsinger)：同 1. 或者 2. 差不多級數

5. 靜星、自由之魂：國產之中都算係貴，「蔗渣」之中既極品

留意有啲牌子唔包 footprint，要自己再買，但好多時啲賣家都月套餐，留意 footprint 唔好貪大張，因為若果大過個營，落雨既時候反而載住啲水，滲返入去你個營仲衰！Footprint 呢啲野係隔一隔污漕，防水再好少少，要洗都易過洗營咁既唧。

露營用 USB 電蚊香？

近年有個趨勢，就係露營咩都轉用電，以前連燈都用氣燈，依家行 LED 又輕又光，用電又不多。

我都有啲身痕，諗住反正都帶大尿袋，連蚊香都心思思轉用電，因為電蚊香乾淨啲，又慳位啲，當然會重過傳統蚊香，但大家要留意呢樣野：

就係呢件野雖然細，但其實勁食電！0.94A 差不多 1A，實在太食電，不宜戶外使用！

更換反光風繩

露營時踢到，或被踢到風繩都是不開心，甚至是危險的事。試想有人因此跌傷，或是整個天幕因而倒下來，後果可以很嚴重的。

有人喜歡掛小燈，而我也有這類小燈，但最簡單、又不會製造光害的方法，當然就是更換反光的風繩。但更換反光風繩時，可能就暗示要棄掉舊風繩，那就很不環保。我們當然可以等舊風繩壞掉才換，但風繩也頗耐用的。

我想指出，我們可以先換必要的部份，而別的部份可以先留下，直到它們壞了才去換。

要最先更換才反光的，應該就是會接地釘的那些，因為它們最有機會被踢到的。

有甚麼風繩不會被踢到的呢？就是不接地釘的，例如接駁樹木的，或是用來吊起營燈，或是風扇等的，就可以保留用普通的風繩，而換出來的也可以留著，日後再用。

再見我的油爐 BRS-8B

簡單講，佢已經死咗，用咗兩年就玩完了．．．

話說佢第一次失靈，令到我要燒柴，諗返轉頭，可能係我唔識預熱佢，又或者係塞咗，呢點永遠無法肯定。嗰次之後，我曾經將佢解體、清潔，之後就一直安好，直到上嶂上．．．

嗰晚天氣相當凍，我發現泵唔起。簡單講，個泵泵極都好輕，明顯係失壓，當場拆開修理又唔覺有咩唔妥，但總之就用唔到了。

呢個爐可以燒 gas，咁咪諗住插 gas 用了，誰不知臨入預熱管個位漏氣！雖然只係輕微，但都夠煩了... 輕微既意思係漏氣位會著火，但我用口都吹得佢熄．．．不過吹熄咗又著返，死未！好在我有另一個  gas 爐...

第二朝，一切回復正常，你都咪話．．．

話說最近攞出嚟檢查，發現又係失壓，近來的起心肝修理，用佢附送既零件整返好個油泵！

跟住搞埋個爐頭喇！用佢送既零件，換晒啲膠圈．．．

換埋個分火碟、油咀．．．橫掂都係．．．

試用 gas... 漏氣，都係嗰個位，搞極都唔掂．．．

唯有放棄．．．　用咗兩年，用晒一大桶白電油，另外可能再加一、兩支散裝．．．

大概唔會再玩電油，酒精簡單又可靠，若要大火，我已經買咗個有預熱管既 gas 爐，火力都有返咁上下．．．

--

我仲有大半支白電油，上次在嶂上個泵無事唔會漏油，氣就會漏，所以搵次去戶外試吓用埋那些白電油，如果無問題呢，就會繼續用呢個爐，不過唔敢買大大桶白電油了，還是買返散裝，用到佢最後一口氣．．．

田夫仔營地簡介

是咁的，呢度行山路過得多，但一次都未露過，今次決定試一試

呢度無咩優點，而呢個正係佢最大優點，點解呢？

第一，最近行過去都個半鐘以上，遠．．．　

第二，無水源，田清橋下既水頗多，但都有啲污漕，濾一濾都可接受既．．．

第三，無現代化廁所．．．

第四，地方不大，地面有高有低，大既營有難度．．．

第五，電話接收不良，至少要行返出路口先有微弱信號．．．

綜合以上缺點，就變成最強優點：人少！寧靜！

卒之到了！我地由荃錦坳行過去，第一小隊總共要個半鐘，接近係無休息過，揹住 4-5L 水，輕裝都近 20kg，開始時掛水袋在背包，行到一半除返落嚟.... 咁大包水外掛，好似俾人拉往咁行，你都咪話．．．但行順咗其實係 ok，我估我行三個鐘應該都可以．．．

田清橋下，不算死水，但流動很慢，近岸邊有啡色東西浮在水面

可選擇行廿分鐘來回去上游少少取水，心理上好啲啲．．．

睇返個場，佢成長形，有高有低，可能因為無人所以草夠多，我地一行七人，都差不多紮滿個場了。。。　（當時仲有兩個師兄，一家人剛準備離開，夜少少又有一家人入）

呢篇唔係遊記，寫返個營地先，呢個位好多高壓電塔，夜闌人靜時有聲，對身體似乎唔太好？

個場有燒烤爐，有枱椅，有個大既亭，行出路口附近有流動洗手間