露營裝備 L 的心路歷程

無可否認，買野係樂趣之一，但更重要當然係玩喇，除非你係收藏家既唧！因此，本文係以用家角度描述裝備 L 既心路歷程。講咗啲簡單先，比較複雜既留返後邊講。

1. 為咗換牌子：呢個原因相當普遍，但同玩既本質脫節，所以唔多講。

2. 為咗功能：例如無煎 pan 買返一塊，無頭燈買頭燈，無天幕買天幕，呢種最易做決定！想用就要買，無得揀！

3. 為咗提升舒適度：例如買張高啲既枱，又或者舒服啲既櫈，呢種情況就要考慮自己既背重能力！另外又可能係用開口吹氣，身痕想買氣泵咁。

講到呢樣，基本上可以無止境既，因為呢吓係非必要！

靚背包可以提供更舒適既背負，但無必要既。

靚地蓆好瞓啲，勁睡袋凍時暖啲，亦唔係必要，因為可以著多啲衫瞓！

電油爐多人打邊爐快啲，火力大啲！但亦係不必，因為可以慢食唧！

普通天幕換銀面天幕，擋太陽好啲，但會重咗！呢點嚴格嚟講亦不必...

4. 為咗輕量化：呢點好多時候係前一點既相反向度，輕咗既多數都會無咁舒服，當然亦有例外既。若果要行得遠，又或者要幫人帶埋物資，呢樣確係好重要。

輕量化不外乎改用鈦製品，碳纖都係，另外 cuben fibre... 多數都係代表貴咗，若果唔想貴就代表容量會細咗，例如四人營改用三人營，大煲改成細煲之類，大袋變細代，咁樣當然都係會輕咗呢！

輕量化好多時都會有所犠牲，例如減低舒適度 (e.g. 細啲既櫈)，降低容量 (e.g. 細啲既杯)，所以好多時會係原有裝備再加多一套，在極端情況下用既...

但有種輕量化除咗貴之外，係唔會有所犠牲既，平既例如係 210T 改用 20D，貴既係由普通野改用 cuben fibre, carbon fibre 等... 呢種最簡單，因為錢解決到就唔係問題？！

5. 為咗容量：呢點又係上面既相反，想個營多啲人用，或者天幕多啲人用，就自然會重咗！但有時買個大既營，多啲人一齊用，整體可以係輕咗！

講住咁多先...